નવરત્ન સ્તોત્રમ્
છંદ : શ્લોક ૧ આર્યા, ૨ થી ૯ અનુષ્ટુપ્
ચિંતા કાપિ ન કાર્યા, નિવેદિતાત્મભિઃ કદાપીતિ ।
ભગવાનપિ પુષ્ટિસ્થો, ન કરિષ્યતિ લૌકિકીં ચ ગતિમ્ ॥૧॥
નિવેદનં તુ સ્મર્તવ્યં, સર્વથા તાદૃશૈર્જનૈઃ ।
સર્વેશ્વરશ્ચ સર્વાત્મા, નિજેચ્છાતઃ કરિષ્યતિ ॥૨॥
સર્વેષાં પ્રભુસંબંધો, ન પ્રત્યેકમિતિ સ્થિતિઃ ।
અતોન્યવિનિયોગેપિ, ચિંતા કા સ્વસ્ય સોપિ ચેત્ ॥૩॥
અજ્ઞાનાદથવા જ્ઞાનાત્, કૃતમાત્મનિવેદનમ્ ।
યૈઃ કૃષ્ણસાત્કૃતપ્રાણૈ - સ્તેષાં કા પરિદેવના ॥૪॥
તથા નિવેદને ચિંતા, ત્યાજ્યા શ્રીપુરુષોત્તમે ।
વિનિયોગેપિ સા ત્યાજ્યા, સમર્થો હિ હરિઃ સ્વતઃ ॥૫॥
લોકે સ્વાસ્થ્યં તથા વેદે, હરિસ્તુ ન કરિષ્યતિ ।
પુષ્ટિમાર્ગસ્થિતો યસ્માત્-સાક્ષિણો ભવતાખિલાઃ ॥૬॥
સેવાકૃતિર્ગુરોરાજ્ઞા, બાધનં વા હરીચ્છયા ।
અતઃ સેવાપરં ચિત્તં, વિધાય સ્થીયતાં સુખમ્ ॥૭॥
ચિત્તોદ્વેગં વિધાયાપિ, હરિર્યદ્યત્કરિષ્યતિ ।
તથૈવ તસ્ય લીલેતિ, મત્વા ચિંતાં દ્રુતં ત્યજેત્ ॥૮॥
તસ્માત્સર્વાત્મના નિત્યં, શ્રીકૃષ્ણઃ શરણં મમ ।
વદદ્ભિરેવ સતતં, સ્થેયમિત્યેવ મે મતિઃ ॥૯॥
॥ ઇતિ શ્રીમદ્વલ્લભાચાર્ય વિરચિતં નવરત્નં સંપૂર્ણમ્ ॥