સિદ્ધાન્ત રહસ્યમ્
છંદ : અનુષ્ટુપ્
શ્રાવણસ્યામલે પક્ષે, એકાદશ્યાં મહાનિશિ ।
સાક્ષાદ્ ભગવતા પ્રોક્તં, તદક્ષરશ ઉચ્યતે ॥૧॥
બ્રહ્મસંબંધ કરણાત્ સર્વેષાં દેહજીવયોઃ ।
સર્વ દોષ નિવૃત્તિર્હિ દોષાઃ પંચવિધાઃ સ્મૃતાઃ ॥૨॥
સહજા દેશકાલોત્થા લોકવેદનિરૂપિતાઃ ।
સંયોગજાઃ સ્પર્શજાશ્ચ, ન મન્તવ્યાઃ કથંચન ॥૩॥
અન્યથા સર્વ દોષાણાં, ન નિવૃત્તિઃ કથંચન ।
અસમર્પિત વસ્તૂનાં, તસ્માદ્ વર્જનમાચરેત્ ॥૪॥
નિવેદિભિઃ સમર્પ્યૈવ, સર્વં કુર્યાદિતિ સ્થિતિઃ ।
ન મતં દેવદેવસ્ય, સામિભુક્ત સમર્પણમ્ ॥૫॥
તસ્માદાદૌ સર્વકાર્યે, સર્વવસ્તુસમર્પણમ્ ।
દત્તાપહારવચનં, તથા ચ સકલં હરેઃ ॥૬॥
ન ગ્રાહ્યમિતિ વાક્યં હિ, ભિન્નમાર્ગપરં મતમ્ ।
સેવકાનાં યથા લોકે, વ્યવહારઃ પ્રસિદ્ધ્યતિ ॥૭॥
તથા કાર્યં સમર્પ્યૈવ, સર્વેષાં બ્રહ્મતા તતઃ ।
ગંગાત્વં સર્વદોષાણાં, ગુણદોષાદિવર્ણના ॥૮॥
ગંગાત્વેન નિરૂપ્યા સ્યાત્, તદ્વદત્રાપિ ચૈવ હિ ।૮½।
॥ ઇતિ શ્રીમદ્વલ્લભાચાર્યવિરચિતં સિદ્ધાન્ત રહસ્યં સંપૂર્ણમ્॥