શ્રીગોવર્ધનનાથજીના પ્રાગટ્યનું ધોળ

(રાગ : શરદપૂનમની રાત જાણીને વ્હાલે રમવા કીધુ મન રે)

ગિરિકંદરામાંથી પ્રગટ થયા પ્રભુ, આપ ગોવર્ધન નાથ રે,

નંદ-જશોમતિ કેરા લાલન, વ્રજ કીધુ સનાથ - ગોવર્ધન રસિયા રે,

મારે મન વસિયા વ્રજનાથ, મધુરું વહાલો હસિયા રે...ટેક

શ્રાવણ સુદ પાંચમના દહાડે, થયું ભુજા દરશન રે,

ગિરિકંદરામાં બિરાજે વહાલો, શું કહું પ્રસન્ન વદન - ગોવર્ધન

ઘણા દિવસ ભૂજાનું પૂજન, ચાલ્યુ તે વ્રજમાંય રે,

દૂધ લઈને સ્નાન કરાવે, મહિમા કહ્યો નવ જાય - ગોવર્ધન

છિદ્ર સહિત શિલા ગિરિવરની, તેમાં શ્યામ સ્વરૂપ રે,

એક ગાય ત્યાં નિત્ય જાય છે, દૂધ સ્રવે તદ્રૂપ - ગોવર્ધન

એક બ્રાહ્મણની ગાય હતી તેણે, પૂછી ગોવાળીયાને પેર રે,

દૂધ ઘટે છે નિત્ય કેમ મારું ? દોહી લઈ જાય તું ઘેર - ગોવર્ધન

ત્યારે ગોવાળીયાએ એમ કહ્યું, ખબર કાહું નિર ધાર રે,

કોણ પ્રકાર થાય છે આ ગૌનો, કહું સમજાવી સાર - ગોવર્ધન

સાંજ-સવાર ગૌ ટોળામાંથી, ગિરિવર ઉપર જાય રે,

ઉભી રહીને દૂધ સ્રવે નિત્ય, પ્રાણજીવનને પાય - ગોવર્ધન

ગૌ પ્રકાર જોઈ ગોવળીયો, બ્રાહ્મણને લાવ્યો સંગે રે,

અચરજ જોઈ વિસ્મય થયું મન, કહાવ્યું સૌને ઉમંગે - ગોવર્ધન

સૌ વ્રજવાસી ગિરિ પર આવ્યા, બોલ્યા મુખથી બોલ રે,

કોઈ દેવતા કે દ્રવ્ય હોય એમ, કીધો મુખથી તોલ - ગોવર્ધન

ગિરિ શિલા ઉંચકીને જોયું, તો દીઠા સુંદર શ્યામ રે,

પૂછ્યું દેવતા પર્વત કેરા, શું છે તમારું નામ - ગોવર્ધન

પ્રાણજીવન ત્યારે એમ બોલ્યા કે, દેવદમન મુજ નામ રે,

મહિમા ચાલ્યો વ્રજમાં ઝાઝો, પૂર્ણ કરે મન કામ - ગોવર્ધન

દહી - દૂધ વ્રજવાસી કેરા, આરોગે નંદલાલ રે,

ઝારખંડમાં જઈ મહાપ્રભુજીને, આજ્ઞા કરી તત્કાલ - ગોવર્ધન

ઈંદ્ર, નાગને દેવદમનતે, પ્રગટ થયા વ્રજમાંહે રે,

ગિરિવર ઉપર આપ પધારી, સેવા ચલાવો ને ત્યાંય - ગોવર્ધન

મહાપ્રભુજી વ્રજમાં પધાર્યા, સદુ પાંડેને ઘેર રે,

વચન સૂણ્યાં ગિરિવર પ્રભુના, વાત પૂછી કરી પેર - ગોવર્ધન

સદુ પાંડે શ્રીમહાપ્રભુજીને, કહે છે પ્રાગટ્યનો પ્રકાર રે

દેવદમન નામે પ્રગટ થયા છે, મહિમા અપરંપાર - ગોવર્ધન

ગિરિવર ઉપર આપ પધાર્યા, સામા મળ્યા નીજ નાથ રે,

અંગો અંગ ભેટી સુખ ઉપજ્યું, જોડયા પછી બે હાથ - ગોવર્ધન

ગોવર્ધન ઉદ્ધરણ ધીરનું, નામ ધર્યું શ્રીનાથ રે,

મોરપિચ્છનો મુગટ ધરાવ્યો, બંસી દીધી હાથ - ગોવર્ધન

પાટે બેસાડીને ભોગ ધરાવ્યો, ત્યાંથી પધાર્યા આપ રે,

નિજ જન મન આનંદ વધાર્યો, દૂર કીધા તન તાપ - ગોવર્ધન